May Corporate Social Responsibility (CSR) si Joel Torre.
By Boy Villasanta
Ito ay ang pagpapakain ng mga paslit sa ilang bahagi ng Pilipinas tulad ng Bangsamoro Autonomous Region in Muslim Mindanao o BARMM.
“Meron din kami sa Isabela,” pahayag ni Joel.
Hindi lamang street kids ang pinakakain niya Kundi kahit na ang mga simple at ordinaryong bata.
Ang tawag ng aktor sa kanyang programa ay “JT’s Meals for the Kids.”
Napakagandang gawain at layunin nito para sa mga kababayan natin.
Knowing Joel, talagang taos-puso ang kanyang paniniwala sa adhikaing ito.
Bagamat walang foundation o anumang socio-civic organization si Joel ay nakikipagtulungan naman siya sa United Nations World Food Programme.
Iba ang pulso at puso ni Joel, isang tunay na alagad ng sining na may pagkandili sa kapwa dahil ang kanyang diwa ay para sa pagtaas ng kamalayan ng taumbayan lalo na ng kanyang mga tagahanga.
“Bastat sa bawat kain ninyo sa JT’s Manukan Grille, makakaasa kayo na nakakatulong kayo sa mga Kabataan,” wika pa ni Torre.
May QR Code aniya na puwedeng magpasa ng mga impormasyon tungkol sa kanyang proyekto na matatagpuan sa Facebook ng JT’s Manukan Grille.
Alam ba ninyo na noong 2003 itinatag ng premyadong aktor ang kanyang chicken house?
Sa may Valencia Street ito sa may Ortigas Avenue malapit sa dating upisina ng Regal Films bagamat ito ay ari-arian pa ng mga Monteverde.
Noong bago pa lang ang JT’s Manukan, madalas kaming mga taga-showbiz kumain d’yan.
Natatandaan ko pa, d’yan kami nagmiting ni Willie Revillame nang siya mawala sa ABS-CBN at nakatakdang magsimula ng bagong programa sa TV5.
Gustung-gusto ni Willie ang chicken inasal ni Joel kaya lagi siyang nakatambay rito pag walang shooting o anumang showbiz commitment.
Ngayon ay parang kabute nang nagsulputan ang mga JT’s Manukan Grille sa iba’t iba panig ng kapuluan.
Pero bakit chicken inasal business ang napiling Negosyo ni Joel?
“Kasi, taga-Bacolod ako. Kilala ang Bacolod City sa inihaw na manok kaya ‘yon ang una kong naisip na itayong Negosyo,” tugon niya.
Sa ngayon ay napakarami nang JT’s Manukan Grille sa Pilipinas at sa ibayong-dagat.
Ayon kay Joel, meron na siyang mga branches sa Dubai at Singapore.
At sa Siargao, dalawa anya ang kanyang inasal house.
“May daughter manages the branch in Siargao,” he announced.
At sa Bacolod City kung taga-saan si Joel ay may dalawa ring sangay ang chicken house.
Hindi naman nakakaapekto ang kanyang showbiz work sa pagtatrabaho sa kanyang inasal hub.
“May meeting kami every week,” wika ni Torre.
Sa ngayon, humigit-kumulang sa apatnaraang empleyado na ang nasa ilalim ng pamamahala ng ating bida.
“Masarap ang pakiramdam ng nakakatulong sa kapwa. Kasi, sa pamamagitan ng JT’s chicken ay nabibigyan namin ng trabaho ang mga tao. ‘Yon ang mahalaga,” pahayag ni Joel.
Ano naman ang pinakamabigat na problemang sumapit sa kanya mula nang simulant niya ang kainang ito na ngayon ay dalawampu’t anim na taon na?
“No’ng pandemic, matindi ang problema. Kasi, talagang walang kliyente pero nakayanan namin. Dapat ay may formula ka na talaga ng management at ‘yon ang ia-apply mo sa mga problema o kahit na walang problema,” paliwanag ng isa sa mga bida ng “A Secret in Prague” ng TV5.
Remember, Joel finished his Marketing and Mass Communications sa De La Salle University sa Bacolod kaya naman may armas siya sa buhay lalo na sa larangan ng negosyo.
Perpekto ang pagtatambal ng marketing ar communication arts sa pagtatagumpay niya sa showbiz.
Kasama rin si Joel sa pan-Asian crime thriller na “Kidnap Game” na ipapalabas sa Vui sa mga darating na araw.
Ang “Kidnap Game” ay mga yugto ng iba’t ibang klase ng kidnapping sa Asya at kung paano nasusugpo ang mga ito sa pamamagitan ng awtoridad na siyang ipapakita ng mga bituin kabilang si Joel.
